1. 交通安排
因為大部份小動物都唔可以乘搭公共交通工具，所以主人們最好預先安排來回交通，咁就唔怕因為臨時call唔到車而影響拍攝進度😉 至於有揸車嘅主人們，都可以預早比小動物熟習一下坐車感覺，咁到拍攝當日就自然更加順利！
2. 寵物用品
拍攝當日，小動物會見到好多陌生人、陌生地方、陌生器具等，所有東西都有可能令到佢地感到不安，如果主人能夠帶備一啲能讓佢地感到熟悉嘅東西，例如平日玩開的玩具、零食、床仔、甚至尿墊、尿盤，都可以幫到佢地更放鬆😊
3. 主人衣著
如果寵物性格比較膽小，有可能會匿埋，或者會因緊張而喘氣、流口水或出爪的話，主人衣著最好係輕便、方便照顧寵物。尤其留意，如果要穿著晚裝或婚紗，就最好揀一啲無咁易爛或自購嘅，咁就唔使擔心因整爛婚紗而產生額外費用了。
4. 拍攝時間
其實小動物就好似小朋友一樣，佢地可以好活潑，但好快就會累，需要休息。對佢地黎講，最佳拍攝時間為1至2小時，拍攝過程可以邊玩邊拍攝，唔好比太大壓力佢地，效果就會更自然同舒服😉
5. 拍攝地點
一般而言，室內拍攝會最舒適及最安全。拍攝時一般都唔會上繩，所以室內拍攝就唔怕小動物周圍走喇😊
